My gedigte

Daardie strepie tussen-in

blank-gravestone-11069695 copy

Daar is niemand wat weet

Nie gewone mens of profeet

Wat gebeur as die einde kom

Ons kan wik en ons kan skik

Op die einde bly ons net

Twee datums op ‘n klip

‘n Begin en einde

In iemand se kop

Ons kan wonder, ons kan dink

Maar steeds weet ons te min

Op die end is al wat tel

Daardie strepie tussen-in

Categories: My gedigte | 16 Kommentaar

Siel van glas

 

Die son gooi spatsels blink teen ruite

‘n siel kruip stil na buite.

‘n Siel van glas

na lank weer sonder huil,

deur tyd en trane skoongewas

van wintervuil.

‘n Siel wat kyk deur splinterglas

wat vrede het met dit wat was

en jou dan vind…

en weer leer lag.

Categories: My gedigte | 10 Kommentaar

Sonder storie

Nuwe woord dokument

wit op die skerm

ongeskend

 

Tart my met die alfabet

uitgestring van a tot z

 

My kop is leeg

my kop is vol

my kop is toe

my kop is dol

 

Woorde het ek

ontelbaar veel;

tussen kop en vingers

word my sinne gesteel

 

Ek wil ‘n storie vertel

van ‘n vrou wat trane tel

van ‘n kind by ‘n deur

van lag sonder seer

van engele wat waak

oor als wat saak maak

 

Ek het my woorde verloor

voor jy die storie kon hoor

Categories: My gedigte | 6 Kommentaar

Chaos van gees

Gedagtes wat draal

Verdrink in my kop

Kry dit nie stil

Kan dit nie stop

 

Niks maak meer sin

Geen woord, geen idee

Probeer ek verstaan

Sleep dit my mee

 

Verdwyn in my kop

Buite bereik

Loer van daar ver

As dit dink ek nie kyk

 

Woorde, idees

Wat ek nie verstaan

Soos koeëls wat verdwaal

En nêrens heen gaan

 

Skryf ek dit neer

Om later te lees

Word dit ‘n chaos

Uit ‘n verwarde gees

Categories: My gedigte | 5 Kommentaar

Tot dan

Tot die see nie meer sout is
Tot die winde nie meer waai
Tot die lug nooit weer blou is
Tot die aarde ophou draai

Tot die swaeltjies nie weer terug kom
Tot die wereld ophou oorlog maak
Tot die blomme nooit weer blom
Tot die maan vir altyd wegraak

Tot die son se strale ophou
Tot dan sal ek jou
Onthou.

Categories: My gedigte | 4 Kommentaar

Blog at WordPress.com. The Adventure Journal Theme.

Follow

Get every new post delivered to your Inbox.

Join 724 other followers