Gedagtes

Die pad terug en die GP-Blond

Dinsdagoggend net voor 5 maak ek die laaste plaashek agter my toe. My hart is swaar en my trane sit vlak. Maak nie saak hoe groot hulle is nie, dit bly maar ‘n slegte ding as jou kind ver van jou is. Nie dat mens elke dag hul drumpel wil deurtrap nie, dis net makliker om te weet hulle is ‘n halfuur ver eerder as ses en ‘n half uur. Ek bere vir eers my hartseer, want ek weet die pad terug gaan al my aandag verg.

Die keer is Megan nie by om kommentaar te lewer oor taxi’s wat van agter aangestorm kom nie, maar gelukkig is die pad so vroegoggend nog redelik stil. Op Beaufort-Wes is dit net mooi tyd vir ontbyt. Na ons geeet het, is die enigste rede hoekom ek die blonde meisie oplet, omdat sy so na aan my parkeer het, dat ek byna nie my deur kan oopkry nie. Ek sien haar egter net skrams, omdat sy op dieselfde oomblik in haar VW Polo klim. Ek trek eerste uit die parkering en merk in die verbygaan op dat dit ‘n blinknuwe motor is, en dis ‘n GP registrasie nommer.

Dis nie inligting wat ek doelbewus ingeneem het nie, dis van daardie dinge wat mens raaksien en later eers weer onthou. As daar iets gebeur het.

Die iets gebeur ongeveer tien kilometer buite Beaufort. Sy moes eers petrol ingegooi het toe ek daar weg is, want sy was nie onmiddellik agter my nie. Ons is vier motors wat agter ‘n trok vashaak, ek is derde en agter my is ‘n swart Jeep. Die motor wat reg agter die trok is, het pas ‘n gaping gesien en verbygegaan en my aandag is vorentoe gevestig toe ek skielik die wit links van my gewaar. My eerste reaksie is skrik en toe ongeloof en daarna witwarm woede.

Die blond in die GP Polo het met ‘n spoed van agter die swart Jeep gekom en ons almal, die trok inkluis, aan ons linkerkant verbygegaan, anderkant die geel lyn! Sommer net so. Ek kon nie glo wat ek sien nie. In hierdie tyd word daar heeltyd gemaan teen roekelose bestuur en daar is al soveel mense dood op die pad en sy jaag so aan. As enigeen van ons ander net ‘n aks na links moes padgee vir enige aankomende verkeer, was dit ‘n gemors. Om nie eens te praat van wat sou gebeur het as die trok vir ons padgemaak het en haar dalk nie gesien het nie.

Sy is ook net verby toe gee die trok wel pad na links sodat ons ander hom verby kan steek. Ek kook nog van verontwaardiging toe ons skaars 5 kilometer verder ‘n verkeersman in sy motor langs die pad sien staan. Dis toe wat ek besluit te hel met dit en ek slaan remme aan en stop sommer dwars langs die verkeersman, klim uit en beduie vir hom van die blond met die GP Polo, wat toe reeds in die verte verdwyn het. Hy kyk my eers aan asof hy dink ek maak ‘n grap, maar toe hy sien ek verwag regtig reaksie van hom, klim hy darem in sy motor en sit haar agterna. Toe ek daar wegtrek, wonder ek of hy haar ooit gaan inhaal en verwag enige oomblik dat hy van voor af gaan kom, onverrigter sake.

Seker maklik tien kilometer verder, toe ek om ‘n draai kom, staan die flitsende blou ligte skielik langs die pad, met die wit Polo voor. Hy het haar toe wragtig gevang. Ek stop agter hulle en stap nader en is nog skaars by haar venster toe sy begin praat.

“Ek is jammer, ek is regtig verskriklik jammer. Ek het vir hom gese ek is baie jammer.”

Sy is so wit soos haar Polo geskrik en so jonk soos my eie meisiekind. Ek is sommer van voor af kwaad.

“Jy was roekeloos en dis ‘n idiotiese onverskillike ding wat jy gedoen het! Jy kom van ver af en daar le nog ‘n lang stuk pad voor jou Kaap toe. En jy ry SO, op hierdie pad. Wat de hel het jy gedink? Wat dink jy, hoe gaan jou ma en pa voel as jy verongeluk? Of ander mense se dood veroorsaak? Jy is alleen en haastig en ongeduldig, nou stel jy jou eie EN ander mense se lewens in gevaar!”

Ek steek vir haar ‘n preek van epidermiese proporsies af wat selfs die verkeersman laat luister. Toe ek stilbly, vra hy ewe of ek dink hy moet vir haar ‘n boete gee.

“Ja, ek dink beslis jy moet vir haar ‘n boete gee, sommer ‘n ordentlike een, sodat sy vir die res van haar lewe sal onthou om ordentlik te ry.”

Toe draai ek om en ek loop klim terug in my kar. Die verkeersman loop saam en vra my naam en telefoon nommer en skryf my registrasie nommer neer en vertel my ewe om my veiligheidsgordel vas te maak en veilig verder te ry. Eers so dertig kilometer voor Laingsburg haal die Polo my weer van agter in. Ek maak vir haar pad om verby te gaan, want op die langpad sal ek nooit ‘n vinniger voertuig aspris agter my vashou nie. Sy flits ewe dankie. Ek wonder of sy de hel in is vir my en of sy dalk net iewers in haar rasionele denke sal dink dat ek haar dalk, moontlik, miskien van ‘n ongeluk gered het deur haar in die bek te laat ruk. As dit my dogter was wat so onverskillig gery het, sou ek wou he dat iemand haar moet rapporteer, eerder as om haar te los totdat ‘n oordeelsfout haar of ander mense se lewens kos.

Gisteraand hoor ek op die nuus hoeveel mense al dood is op ons paaie, 39 per dag vanaf 1 Desember, en dat die regering nou wetgewing wil maak dat jou lisensie permanent opgeskort kan word vir dronk, roekelose of nalatige bestuur. Ek hoop die blond met die GP Polo het dit ook gehoor en dalk, net dalk, sal sy volgende keer dink voor sy doen terwyl sy bestuur.

En dalk sal sy eendag vir haar kinders vertel van die kwaai vrou wat haar een keer op die langpad laat besef het ‘n lewe is kosbaar en nie die moeite werd om weg te gooi net omdat jy haastig is nie.

13 thoughts on “Die pad terug en die GP-Blond

  1. Ek salueer jou vir die moed (Courage) wat jy wys. Ek klink ‘n glasie op jou vasberadenheid en ek sleep sommer ‘n hele kas wyn nader vir jou totale omgee vir die mens. Mens kan die wereld verander. Jy wys dit. Een blond met ‘n polo op ‘n slag. BRAVO!!!!!!!

  2. Shame, man! Ek sou haar darem nie ‘n boete laat kry het nie ~ ‘n groot skrik doen meestal die ding. Maar jy het oemf om sommer die spietkop op haar spoor te sit, lol! 😆

  3. Dankie Son dat jy die “gutz” gehad het!! Eendag lees ons nog dalk op ‘n blog hoe die blond se weergawe klink!
    Ek glo sy het ‘n les geleer! Want as sy nie het nie, gaan dit haar duur te staan kom!

  4. Ons het twee paai na die buurdorp – een “scenic” kuslangs en een agter die duine. Die een is geteer, die ander is ‘n “soutpad”. Ek ry veral nou die langer soutpad agter die duine as die mooie kuspad… daar is te veel ongeduldige ape op die pad en ten spyte van die permanente padblokkade, is daar javels wat drink en bestuur. Ons kuspad is bekend vir sy baie ongelukke. Ek is seker baie daarvan is as gevolg van ongeduld.

  5. Ek dink hierdie storie het ‘n ander kant. Ek dink voertuie het die trok in die begin verby gesteek, so een vir een, totdat daar iemand was wat nie die selfversekering gehad het om verby te kom nie. Dit het ‘n ketting reaksie veroorsaak wat dit al hoe moeiliker gemaak het vir die voertuie verder agter in die ry om verby te kom. Natuurlik sal nie een van hulle links hou sodat die res van die verkeer kan verby kom nie. Nee. Dis mos ‘n kwessie van as ek nie kan verby nie dan mag niemand verby nie. As ek daai verkeers beampte was, het ek elke liewe een van julle beboet omdat julle sulke assholes was en omdat julle gedrag gelei het tot die vrustrasie van ander pad gebruikers. Vir jou Son sou ek ‘n dubbel boete gegee het omdat jy jou verlustig het in die feit dat die blond afgetrek is en ek sou al jou boete geld vir haar gegee het. Hoekom het jy nie sommer die doodstraf aanbeveel vir haar oortreding nie?

    Ek stem oor een ding saam. Daar behoort strenger wetgewing te wees om dit moeiliker te maak vir enige aap en sy maat om ‘n bestuurders lisensie te bekom. Gevorderde bestuurs kursuse behoort verpligtend te wees sodat mense soos julle (kommentators hier bo ingesluit) weg gehou kan word van die sleutels van ‘n motor voetuig. Dis nie ‘n speelding nie en as jy nie bevoeg is om een te ry nie, vat ‘n bus.

    1. Andrew, ek kan jou verskeie dinge antwoord, maar ek gaan myself nie eens verwerdig nie. Eintlik wil ek net vir jou sê moenie oor goed spekuleer en kommentaar lewer as jy nie by was nie. Oor een ding is jy reg, ‘n motor is nie ‘n speelding nie en iemand wat sulke dwase dinge soos die blond doen, moes beslis eerder die bus gevat het. En jy dalk saam met haar😈

  6. Halleluja! Kouevuur, as daar nou ‘n prys gegee kon word vir sosiale betrokkenheid of so iets, moet jy dit verseker kry! Ek het ook al probeer om roekelose bestuurders te laat vang; sonder sukses. Stem saam, ons moenie dit ignoreeer totdat daai persoon EN ander, statistieke geword het nie.

    Ek gaan dié blog promote…..dink sommer baie jongmense moet dit lees!

Lewer kommentaar

Verskaf jou besonderhede hieronder of klik op 'n logo om in te teken:

WordPress.com Logo

Jy lewer kommentaar met jou rekening by WordPress.com. Log Out / Change )

Twitter picture

Jy lewer kommentaar met jou rekening by Twitter. Log Out / Change )

Facebook photo

Jy lewer kommentaar met jou rekening by Facebook. Log Out / Change )

Google+ photo

Jy lewer kommentaar met jou rekening by Google+. Log Out / Change )

Connecting to %s