Die Lewe

Twee in een lees-reis

Voorverlede week leen iemand by die werk vir my Natasha Sutherland se boek, Bittersoet. Ek het al geruime tyd Steve se “Mense van my asem” op my boekrak (as geskenk gekry met my verjaarsdag) en het al paar keer begin lees daaraan, maar kry net nie lekker vatplek aan die boek nie. Ek is nie juis iemand vir biografieë nie, dus neem ek Natasha se boek, met die belofte dat ek dit sal probeer lees.

Almal wat kan lees ken Steve en Natasha se storie en ek weet nie regtig of ek NOG daarvan wil lees nie. Ek maak egter twee aande later die boek oop en ek hou nie maklik weer op met lees nie. Dis natuurlik ‘n vertaling van haar boek “Bittersweet”, maar die vrou het wragtig ‘n slag met woorde. Die hoofstukke is kort en kragtig en nie een keer word dit ‘n vervelige storie oor ‘n verbitterde vrou in haar liefde verneuk en verlaat nie.

Nee, dit word ‘n leesreis na selfstandigheid en self-erkenning en selfliefde vir elke vrou wat al ooit deur ‘n man verraai, seergemaak of verniel is. Vir elke vrou wat in ‘n huwelik is, maar eintlik eensaam en alleen die pad stap.

Dit wys hoe sommige vroue keer op keer die verkeerde man kies, omdat jy iemand soek om jou heel te maak, terwyl die antwoord op heel wees eintlik in jouself lê. Die kostelikste aanhaling in die boek is waar die klein seuntjie bid: “Here, as U my nie ‘n beter seuntjie kan maak nie, moenie daaroor worry nie. Ek geniet die lewe net soos ek is!”

Saam met Natasha stap mens die pad en sien hoe sy weer haar self vind en haar lewensvreugde terugkry.  Na aan die einde van die boek, waag sy dit weer in ‘n verhouding in, al is sy skrikkerig. Maar sy besluit dat sy, soos Cyndi Lauper, sal sing “Don’t be afraid to let them show your true colours, true colours beautiful like a rainbow.” Dat sy werd is om liefgehê te word vir wie sy is, net soos sy is.

Ek het skaars die boek se laaste bladsy toegemaak, of ek kry my nuwe speelding, my e-reader, en tesame daarmee toevallig ‘n gratis e-boek deur ‘n tydskrif.

Ruitevrou deur Maretha Maartens. (gegrond op ‘n ware verhaal)

Hierdie boek maak my kwaad, hartseer, opstandig en nog ‘n paar onnoembare dinge.

Een van die voorwoorde is: “Wanneer is genoeg genoeg?” is die vraag wat ‘n mens jou afvra by die lees van hierdie deernisvolle verhaal oor mishandeling binne ‘n verhouding.

Dis ‘n ware verhaal oor ‘n vrou wat ‘doodgemaak’ is en doodgemaak het.

Die boek is al twaalf jaar gelede geskryf, en al het vele dinge verander, al het mishandelde vroue en kinders stemme gekry, is daar baie wat nog swyg.

Maretha skryf in 2009 in die Voorwoord: “Wanneer onreg aan die lig kom en die soeklig dalk vir die eerste keer wit en gefokus op lank versweë dinge in ‘n bepaalde gemeenskap val, trek daar skokgolwe deur so ‘n gemeenskap. Twaalf jaar gelede, toe Ruitevrou met sy inhoud van lank versweë dinge sy eerste druk beleef het, het daar ‘n storm losgebars. Dit kan nie die waraheid van tienduisende vroue se werklikheid wees nie, is gesê. Twaalf jaar later herken baie vroue hulleself steeds in hierdie verhaal.”

Met die herdruk na twaalf jaar het die uitgewer haar gevra of sy iets aan die boek wil verander.

Haar antwoord: “Nee. Al wou ek, kan ek nie hieraan verander nie. Wat hier geskryf staan, is die waarheid. Die waarheid deurstaan die toets van die tyd. Onveranderd en van die leuen ontdaan, sal dit vroue wat daardeur aangeraak word, vrymaak.”

Die twee boeke saam was ‘n kragtige leeservaring. Elke vrou wat al die pad gestap het van mishandel word, emosioneel of fisies, of nog steeds stap, MOET hierdie boeke lees. En ook dié wat hierdie vernedering genadiglik misgelewe het.

4 thoughts on “Twee in een lees-reis

  1. ek het Natasia se tweede boek ook gelees , dis `n awesome boek en ek sal dit vir enige een aanbeveel🙂 Sprokie “fairytale” is baie beskrywend en as mens dit begin lees het dan hou jy nie op nie . Ek was so verras toe sy my gekwoteer het wat ek vir haar op “facebook” gese het , sy het gevra wat mens gelukkig maak, watter geure , toe se ek die geur van lemoene as jy dit skil en lavender , want dit maak my kalm, om my naam in die boek te sien asook wat ek vir haar gese het , was vir my so verrassing🙂 het haar bedank daarvoor ! sy is `n pragtige mensx

  2. Wat ek baie oor wonder is wie regtig agter die goedgesrewe woorde sit. Hoeveel is eie woorde en hoeveel is ure se sweet deur ‘n editor om dit verkoopbaar te maak. Want face it, dit is haar naam op die boek wat dit verkoop, nie omdat sy geken is as ‘n literêre genie wat al 5 internasionae boekpryse gewen het nie. Ek voel dieselfde oor Steve se skribbels.

  3. Hoe gee ‘n tydskrif ‘n eboek gratis? Watter een was dit? Sal graag die boek wil lees. Maar wat me Sutherland se boek betref was ek te vies vir haar omdat sy altyd so snedig was oor Afrikaans, en weier dat daar in haar huis Afrikaans met haar kinders gepraat word, en toe is ons Afrikaanse lesers goed genoeg toe dit by Rand en Sent kom. Toe koop ek hom nie.

    1. Dit was in die Finesse van Julie 2011 – daar was so 4 boeke waarvan jy een kon kies. Hulle gee presiese aanwysings hoe om dit af te laai.

      Ek het nie van Me Sutherland se uitsprake oor Afrikaans geweet nie, en het intussen haar ander boek ook gekoop. Ai tog😦

Lewer kommentaar

Verskaf jou besonderhede hieronder of klik op 'n logo om in te teken:

WordPress.com Logo

Jy lewer kommentaar met jou rekening by WordPress.com. Log Out / Change )

Twitter picture

Jy lewer kommentaar met jou rekening by Twitter. Log Out / Change )

Facebook photo

Jy lewer kommentaar met jou rekening by Facebook. Log Out / Change )

Google+ photo

Jy lewer kommentaar met jou rekening by Google+. Log Out / Change )

Connecting to %s