Nuwe woord dokument
wit op die skerm
ongeskend
Tart my met die alfabet
uitgestring van a tot z
My kop is leeg
my kop is vol
my kop is toe
my kop is dol
Woorde het ek
ontelbaar veel;
tussen kop en vingers
word my sinne gesteel
Ek wil ‘n storie vertel
van ‘n vrou wat trane tel
van ‘n kind by ‘n deur
van lag sonder seer
van engele wat waak
oor als wat saak maak
Ek het my woorde verloor
voor jy die storie kon hoor
Gedagtes wat draal
Verdrink in my kop
Kry dit nie stil
Kan dit nie stop
Niks maak meer sin
Geen woord, geen idee
Probeer ek verstaan
Sleep dit my mee
Verdwyn in my kop
Buite bereik
Loer van daar ver
As dit dink ek nie kyk
Woorde, idees
Wat ek nie verstaan
Soos koeëls wat verdwaal
En nêrens heen gaan
Skryf ek dit neer
Om later te lees
Word dit ‘n chaos
Uit ‘n verwarde gees
Tot die see nie meer sout is
Tot die winde nie meer waai
Tot die lug nooit weer blou is
Tot die aarde ophou draai
Tot die swaeltjies nie weer terug kom
Tot die wereld ophou oorlog maak
Tot die blomme nooit weer blom
Tot die maan vir altyd wegraak
Tot die son se strale ophou
Tot dan sal ek jou
Onthou.
Gee my al jou gisters, ek gee jou al my môres
Gee my al jou trane, ek gee jou al my lag
Gee my al jou hartseer, ek gee jou al my blydskap
Gee my al jou donkerte, ek gee jou al my lig
Gee my al jou lelik, ek gee jou al my mooi
Gee my al jou haat, ek gee jou al my liefde
Gee my al jou stukkend
Ek maak dit vir jou heel
Gee my al jou winters
En ek gee jou al my son.
Ek wonder of jy weet,
en of jy dalk kan sien,
ons het jou nog nie vergeet.
Ek wonder of jou mooi bruin oë
nog altyd baie lag
en net in mooi dinge glo.
Ek wonder nog oor jou en my,
oor wat sou wees
as jy hier kon bly.
Ek wonder hoekom het jy
daardie aand gestop
toe jy liewers moes ry.
Ek wonder;
Is die skadu langs my
soms dalk jy?
En elke keer as ek wegloop by jou graf
dan hoor ek weer;
“Daar is geen pistole nie,
geen pistole in die hemel nie!”
En ek wonder
Is dit jy?
Kommentaar